لحك وغطاه

والدين ومرا وزوج ولاد معمرهم شافوني بعييد بزاف عليهم يمكن معمرني نشوفهم لحاجة لوحيدة لي كتبالي هيا ضلام وصحرا واحد صقيل معمري 
حسيت بيه ولحاجة لي كتضحك هيا غيقتلني لبرد فصحرا شوف العبثية.. فديك دقيقة لخرة كتشوف حياتك كلها قدامك فين كنتي وشنو درتي باش توصل لتما وهادشي لي باغي نعاودلك.. لواليد قالك مقودة عليا منقدرش نبني جامع نخليك نتا صدقة جارية عند بالو غنطلع من هادوك ل1% من لمغاربة زعما صلاة وجامع ولقراية ساعة غلط فلمقادير فاش كان كيوجد فيا زاد شي طريف دلحشيش بالغلط (واييه مأنسبيري من فتيات لقوة غا هنينا) لمهم من صغر مكين غا لله يعطك صحة لواليدة ديما ماشي ليها صوت كتلع لصطح وكتبدا تودن بسميتي ولواليدة سبحان الله تقول مراضعا مع أم كلتوم وخا نكون داير لكيت وفراس درب كنسمعها.. لمهم لواليد شيفور ديال طوبيس ومن دوك شوافريا لي هرباان ليهم ومزوج بطبيبة مبغاتش تدخل ليا لدماغي كيدار ليها لمهم واحد لوقيتا فصغر قبل مياخدو تقاعد ويساليو ليا كنت كنبقا فدار بوحدي بزااف وكأي طفل مغربي بوحدو فدار وتلفازة قدامو ترعرعنا مع هل تريدين شد أردافك.. جو يا إلاهي هدا الجهاز مذهل إيييه خلوني نعاودلكم راها طفولة فأااااحسن جيل فالعاالم أه و أف ام ودلع هاح خليني ساكت هاد تيليفونات خرجو على هاد لجيل ولاو يلقاو كلشي موجود دراري رطبين لله يستر لموهييم فين خليناها أه وخا كان لواليد ولواليدة حاضين معايا بزايد حيت لوحيد لي عندهم وزايد معطل كنت قبيح إلا مسمحش ليا بنادم لي كان كيقرى معايا معندي فين ننعس على والو كنشنق ضروري نرجع لدار بشي ضربة لواليد كيحساب ليه دراري كيحڭرو عليا مسكين مكيشوفش هوما كيفاش كنخليهم لمهم بقا كيبزز عليا لصال مبغيتش قاليا غندخلو بزوج غنمشيو نضحكو ونتحركو شويا وكما قلتلكم لواليد كبير فسن مكملش سيمانة ولا كيقوليا غا سير أنا لاحق عليك ومكيجيش كملت أنا بوحدي تما ومسحور أنا ساحرين ليا وتقول زعما شي نهار نطيح لشي درية فليسي كتوبا ونهبطو نجمعوهم بزوج وتزعط واالو تجربة دلحب لوحيدة هيا ملي وصلاتني أنفيطاسيون من بنت معمري شفتها شعر زعر والعينين زرقين ولكونط يلاه مقاد وسلام سلام عجبتيني تصاحب معايا طبعا مراهق فلبلاصة وليت كنبغيها هاديك لي فتصاور وطبعا لقصة لكلاسيكية معندهاش تيليفون ولبيسي مفيهش كاميرا و.. كنت كنقول فأخيب سيناريو غتكون كتحشم ولا خايبة كااع نهار علقو نتائج دلباك وطبعا نجحت فديك ليلة صدمة طلع غير واحد لبرهوش كيقرى معايا كنت كنضربو طلعها عليا وكيف أحب بعد هدا دبا وليت محسوب عليهم عقدني ديال بصح شمتني شمتني ومعاودتش شفتو من داك نهار.. لواليد كان باغيني ندير لقانون مورا لباك وداكشي لي كنت غندير باغي نجرب لهيت دلفاك ونقدر نتلاقا بداك زويمل غادي نعدمو ولكن لواليدة عينها كبيرة ولواليد أمبوستاحيل يقول لواليدة لا وهنا كيجيو بفكرة يصيفطوني على برى لواليد مخدامش شي خدماا ولكن جامع حصيصة ولواليدة بلاما نهضرو عليها وليت ضريااف وبعقلي لواليد مزال ملقيناش حتى شي جامعة فين نمشي بدا بنصائح ولواليد كيبدع فشي حاجة سميتها تحت صمطة فينما نهضرو فلموضوع كيقولي ضرب وقيص فليهود راه فيهم لمرض.. مكنتش متيق بلي غادي يخلوني نمشي كان يحسابلي عزيز عليهم لوحيد زعما صدقو باغين غير يتهناو مني نخوي ليهم شاشة داك صيف معقلتش عليه طلع هبط بريطانيا تنادي كنت شبعاان سيريات وأفلام ومزيكا نقدر ندوي تانا بالبرتش أكسنت نتبعصو معاهم وخا غتبقى لكمارة ديما مغربية لمهم دار مخلاوش فجهدهم كلشي واجد لواليدة عندها واحد صاحبتها تما مبقاوش هضرو من يامات ليسي دارت لمستحيل باش جابت نمرتها زعما توصيها عليا.. لواليدة هيا مولات لفكرة وتجري وتوجد وترغب باش تصيفطني وفاش بقات قل من سيمانة باركة كتبكي تقول معمرني أنرجع لواليد تنادم معاه لحال ولا كيقوليا شباليك دير بناقص ونتهلا فولدي هنا.. صافي وصل لوقت موصليني لمطار والو مبغاوش يطلقو مسخاوش وماشي غير هوما واحد راس كيقولي نرجع معاهم لدار ولكن 100 أخرين كيقولو ليا سير باش تحسن نسل نوليو نشوفو شي كمامر زوينين فهاد لبلاد سعيدة وكيف والو ندخل لإسلام لتما يعني غادي لأهداف نبيلة.. لمهم خليتهم وتحركت لواليدة قالتلي بلي غنلقا تما ديك سيدة لي كتعرف لواليدة أسطورة فالإقناع سيدة مشافتهاش قرن وزمارة بالخف عاشراتها تاني لمهم داكشي لي كان وصلت سبحان الله بحالا تقول كنت كنتفرج فشي فيديو ب 144p وبدلت لكاليتي ل 4k لقيت ديك سيدة تما إلا بغيتي تشوف أسعد كائن فالكون خرج شي مغربي من هنا وسير طل عليه سيدة كتضحك غا بوحدها ورااشقا ليها ضو خارج من وجها قالت ليا ديك على سلامتك سلمات عليا خارجين وكتسول كيف دايرا ماماك كيف دايرا لبلاد لحاجة لحمداوية مزال عايشا؟ مزال كتغمسو؟ عرفتي دوك زماڭريا كيسولو شي أسئلة ولد 4 سنين ميسولهاش لمهم ديك ليلة بايت عندهم وغادي نمشي فصباح لجامعة باش نشوف قضية لحي لجامعي.. سيدة ساكنا هيا وراجلها وولدهم عندو ديك 10 سنين ودار مكبيرااش لمهم عطاتني دويت مع والديا راه وصلت.. لغد ليه مشات معايا خديت نمرة وبقات واقفا معايا حتى دخلت لديك لمدرسة ودويت مع الإدارة كلشي ناضي خارج معاها حتى توصل لطوموبيل ودنية عاامرا بنادم وهيا كتحلف فيا باش إلا حتاجيت شي حاجة نعيطلها بنادم كيشووف مكيفهمو والو كيسمعو غير بعبلعخشبعخحبيبي أصلا باينا فيا عربي فبلادنا وكنبانو سمرين تما كنبان بحال أوريو غير دبا شكلاط لي على برى.. وصلني واحد سيد من لإدارة لبيت لي غنبقى فيه دخلت لقيت وااحد ساط من وجهو باينا لأندونيسي قلت ليه سلام عارفو يقدر يكون مسلم وهو يرد سلام بالعربية خونا من لإدارة قالينا ديك لعيبة دتهلاو فبعضياتكم وتحرك..بركت فوق داك سرير وكنخمم فشنو غندير ماشي أي واحد كتعطاه هاد لفرصة دار حاطين فلوس كيجمعو فيها من شحال ودايرين فيا تقة سو خاص نجمع راسي فلقراية باش نرجع فأقرب وقت بارك تما وهيا تعيطلي ديك سيدة كنت عطيتها نمرة جديدة قالتلي واش خاصاك شي خدمة مع دراسة باش تعاون لوقت وتشري شي حاجة إلا بغيتيها وغير معايا انا وراجلي مكينش لي يخصرلك لخاطر.. يلاه غنقوليها لا باغي نخلي وقتي كامل لقراية وهو يقولي واحد راس سير مزيانة تطلق لسان وشي صريف فنفس لوقت مفيها باس سيدة هيا لمعرفة لوحيدة لي عندي هنا.. قلت ليها وخا دوز غير هاد سيمانة باغي نقاد فيها أموري نولف ونسركل شوي